Баабартай, Польшийн Краков хотод 1970-аад оны дундуур хамт сурч байлаа. Тэгэхдээ нэг сургуульд биш. Тэр Ягелоны Их сургуулийн, би Уул уурхайн Академийн оюутан. Польшууд 35 саяуулаа бүгд наймаачин. Польшийн Ажилчны нэгдсэн нам (бидний ойлголтоор Коммунист)-ын дарга Э.Герек нь хүртэл наймаа хийнэ. Гэхдээ өнөөгийн манай дарга нар шиг араб морь, алт зэсний хувийн наймаа эрхлэхгүй. Ард түмнийхээ төлөө том наймааг хүйтэн дайны үеийн хөрөнгийн бирж дээр хийнэ. Тэрээр Польшийн айл өрх бүрийг амины машинтай болгохоор Италийн “FIAT” маркийн суудлын тэрэг эх орондоо үйлдвэрлэх лицензийн эрх худалдаад авчихсан байх жишээтэй. 35 сая наймаачны дунд аж төрж эхэлсэн монгол оюутнууд бид бүгд наймаа хийдэг болж төлөвшинө. Баабар бид хоёр 1977 оны зун оюутны амралтаар Краков хотоос Оросын нийслэл Москва хотод ирж Улсын их дэлгүүр (ГУМ), Төв дэлгүүр (ЦУМ)-т наймаа хийлээ. Өөрсдөдөө л бололцооны хэдэн орос рубльтэй болж аваад Монгол руугаа явах болов. Би Завханы хөдөөний хүүхэд, Баабар 120 мянгатын хотын хүүхэд. Хөдөөд ховор чаминд тооцогдож байсан будаатай шаазан, би бөөндлөө. Баабар 130 рублиэр орос бичгийн машин авч байна. Шууд өөрт нь хэлээгүй болохоос миний бие түүний тэнэгийг гайхахын ихээр гайхлаа. Нэгд, орос үсгийнх учраас монгол цагаан толгойн ө, ү байхгүй. Хоёрт, Баабарын бичсэн зүйл хаана ч хэвлэгддэггүй болохоор гараар бичиж хадгалах, бичгийн машинаар цохиж (шивж) хадгалахын ялгаа юу байна вэ. Одоо бодоход тэрээр надад шууд хэлээгүй болохоос хоол идэж, цай уухад будаагүй орос аяга, будаатай хятад шаазан хоёрын ялгаа юу байна вэ гэж бодсон байх шүү. Миний аз түшихэд Баабар бичгийн машин авсан нь надад маш ач тустай болсон. Учир нь, тэрээр нийтлэлээ бичихдээ хортой цаас хийж хоёр хувь гаргадаг байлаа. Нэг хувийг нь өөртөө хадгална, нэг хувийг нь надад өгнө. Уншигч танд доор толилуулж буй захидал нь Баабарын 1977, 1978 оны үед бичсэн материал. Тэр үед тэрээр Ерэнтэй гэдэг ганцхан уншигчтай, 25 ч хүрээгүй цэл залуухан явж дээ. Б.ЕРЭНТЭЙ. 2013.VII.18
Brak komentarzy:
Prześlij komentarz